पीएसजीको मुख्य प्रशिक्षकमा लुइस एनरिक नियुक्त
२१ असार, काठमाडौं । स्पेन र बार्सिलोनाका पूर्वप्रशिक्षक लुइस एनरिके फ्रेन्च क्लब पेरिस सेन्ट जर्मेन (पीएसजी) को नयाँ मुख्य प्रशिक्षक नियुक्त भएका छन् ।
४३ वर्षी स्पानिस प्रशिक्षक एनरिकेले अब क्रिस्टोफर गाल्टियरलाई रिप्लेस गर्नेछन् । फ्रेन्च लिग वानको उपाधि जितेपनि पीएसजीले एक सिजनपछि नै गाल्टियरलाई बर्खास्त गरेको थियो ।
एनरिकेले फ्रेन्च च्याम्पियनसँग दुई वर्षको सम्झौता गरेका छन् र उनी २०२५ सम्म पेरिसमा रहनेछन् ।
सन् २०२२ को पिफा विश्वकपमा मोरक्कोसँग अन्तिम १६ मा पराजित हुँदै बाहिरिएपछि एनरिकेले स्पेनको प्रशिक्षक भूमिकाबाट राजीनामा दिएका थिए ।
एनरिकेले बार्सिलोनाको प्रशिक्षकको रुपमा धेरै सफलता प्राप्त गरेका थिए । सन् २०१४ देखि २०१७ सम्म उनले बार्सिलोनामा ९ उपाधि जितेका थिए ।
यस्तै उनले बार्सिलोनामा पहिलो सिजनमै ला लिगा, कोपा डेल रे र च्याम्पियन्स लिग जित्दै ट्रेबल उपाधि हात पारेका थिए ।
त्यसपछि उनी सन् २०१८ मा फर्नान्डो हिएरोलाई रिप्लेस गर्दै स्पेनको प्रशिक्षक बने ।
चार वर्ष स्पेनको राष्ट्रिय टिमको प्रशिक्षक रहँदा उनले स्पेनलाई नेसन्स लिगको फाइनल र युरो कपको सेमिफाइनलमा पुर्याएका थिए ।
पीएसजीको टिम ट्रान्जिसनमा रहेका बेला रियल मड्रिड र बार्सिलोनाका यी पूर्व मिडफिल्डरले टिम सम्हाल्न आइपुगेका छन् ।
विशेषगरी क्लबका स्टार केलियन एमबाप्पे र नेमारको भविष्य के होला भन्ने मुख्य प्रश्न छ ।
लिओनल मेसी पीएसजी छाडेर अमेरिकी क्लब इन्टर मियामी जाने पक्का भइसकेको छ ।
कतारी मालिकको स्वामित्वमा रहेको पीएसजीले च्याम्पियन्स लिगको उपाधि जित्न सकेको छैन ।
११औं पटक लिग उपाधि जितेको पीएसजी च्याम्पियन्स लिगमा भने बायर्न म्युनिखसँग अन्तिम १६ मा पराजित हुँदै बाहिरिएको थियो ।
प्रतिक्रिया दिनुहोस्