केन्द्रीय सचिवालय बैठकबाट सिन्धुपाल्चोक इन्चार्ज निष्कासित

२० साउन, काठमाडौं । नेकपा एकीकृत समाजवादीले पार्टीका केन्द्रीय कमिटीका सदस्य तथा सिन्धुपाल्चोक इन्चार्ज सुबास कर्माचार्यलाई निष्कासन गर्ने निर्णय गरेको छ ।

कर्माचार्य सङ्गठनात्मक पद्धति तथा निष्ठामा नबसी पार्टी हितविरुद्धमा गतिविधि गरेकाले उहाँलाई पार्टीको साधारण सदस्यतासमेत नरहने गरी निष्कासन गरेको उपमहासचिव तथा प्रचार विभाग प्रमुख जगन्नाथ खतिवडाले जानकारी दिए। पार्टी अध्यक्ष माधवकुमार नेपालको अध्यक्षतामा शुक्रबार बसेको केन्द्रीय सचिवालय बैठकले सो निर्णय गरेको हो ।

उनका अनुसार पार्टीका सम्पूर्ण कार्यकर्तालाई कर्माचार्यको गतिविधिको भ्रममा नपर्न बैठकले आह्वान गरेको छ । बैठकमा युवा विद्यार्थीलाई व्यवस्थित गर्ने एवं समसामयिक परिस्थिति, पार्टीको कार्यभार र विविध विषयमा छलफल भएको थियो ।

त्यसैगरी बैठकमा यही साउन २० र २१ गते बस्ने स्थायी कमिटी बैठकको आन्तरिक तयारीका बारेमा पनि छलफल भएको प्रमुख खतिवडाले जानकारी दिए ।

पार्टीले आगामी भदौ ५, ६ र ७ गते काठमाडौँमा केन्द्रीय कमिटी बैठक बोलाएको छ ।

थप समाचारहरु

एकीकृत समाजवादीको पोलिट्ब्यूरो बैठक भोलिदेखि, ५ गतेदेखि केन्द्रीय कमिटी बैठक एकीकृत समाजवादीद्वारा कार्यविभाजनमा हेरफेर एकीकृत समाजवादीले अराजनीतिक र अवसरवादी चरित्र देखायो : केपी ओली झलनाथको चेतावनी : सुदूरपश्चिममा मुख्यमन्त्री नदिए सत्ता गठबन्धनमा संकट आउँछ एमालेलाई एकीकृत समाजवादीको जवाफ : सुदूरपश्चिममा दीर्घबहादुर सोडारी नै मुख्यमन्त्री एकीकृत समाजवादीले सबै कमिटीमा दस्तावेज पठाउने,सुझावपछि परिमार्जन गर्ने