शतबीज छर्न पशुपतिमा आइपुगे भक्तजन
२४ मंसिर, काठमाडौं । बालाचर्तुदशी पर्वमा मृतकहरूका आफन्त र भक्तजन शतबीज छर्न पशुपतिमा आइपुगेका छन् ।
पशुपति क्षेत्र विकास कोषले पशुतिपतिनाथ मन्दिर परिसरमा आज रातिदेखि हुने बालाचतुर्दशी पर्वका लागि सम्पूर्ण व्यवस्था मिलाइसकेको छ ।
कोषका प्रवक्ता रेवतीमरण अधिकारीका अनुसार बालाचर्तुदशीको अवसरमा दीपप्रज्ज्वलनदेखि ‘कोर’ क्षेत्रमा शतबीज छर्ने व्यवस्था मिलाइएको जनाएको छ ।
उनले भने, ‘आज रातिदेखि हुने बालाचर्तुदशी पर्वका लागि हामीले कोर क्षत्र, रुद्र काडेश्वरदेखि वनकाली पिङ्गलास्थानसम्म शतबीच छर्ने व्यवस्था मिलाएका छौं।’
आफ्ना दिवङ्गत भएका पितृहरूको सम्झनामा मृतकका आफन्तजनले आज रातभर दीप प्रज्ज्वलन गरी भोलिपल्ट शतबीज छर्ने भएकाले उनीहरूको सुरक्षादेखि सहज ढङ्गले कार्यसम्पन्न गर्नेसम्मको व्यवस्था समेत कोषले मिलाएको प्रवक्ता अधिकारीले बताए ।
उनले भने, ‘नेपाल प्रहरी र सशस्त्र प्रहरीको सुरक्षा मूल शिविर बनाई संयुक्त सुरक्षा योजनाअनुसार भक्तजनको सुरक्षाका लागि कोर क्षेत्रमा शतबीजमार्ग र बत्ती बाली बस्ने स्थानमा पर्याप्त सुरक्षाकर्मी खटाएका छौं। चिसो नहोस् भनेर पालको व्यवस्था गरिदिएका छौं। ’
यसैगरी मृगस्थलीभित्र मृग राखेको स्थानमा पनि शतबीज छर्ने परम्परा भएको मृगस्थली प्रवेश गर्ने द्वारमा पनि विशेष सुरक्षाकर्मीको टोली परिचालन गरिने कोषले जनएको छ ।
कोषले पर्व, मेला र विशेष अवसरमा चोरीका घटना पनि हुनसक्ने सभावनालाई मध्यनजर गरी बहुमूल्य गरगहना लगाएर नआउन पनि भक्तजनलाई आग्रह गरेको छ । यसैगरी छालाको जुत्ता पनि नलगाइदिन अनुरोध गरिएको छ ।
प्रतिक्रिया दिनुहोस्