कांग्रेस महासमितिको समापनमा शीर्ष तहका सबै नेताले धारणा राख्ने

१० फागुन, काठमाडौं । नेपाली कांग्रेसको समापन समारोहमा पदाधिकारी, पूर्व पदाधिकारी र प्रदेश सभापतिहरुले धारणा राख्ने भएका छन् ।

शीर्ष नेताको बैठकले समापन समारोहमा बोल्न व्यक्तिहरुको निर्णय लिएको हो । ‘पदाधिकारी, पूर्व पदाधिकारी र प्रदेश सभापतिहरुले समापनमा धारणा राख्नुहुन्छ,’ प्रचार विभाग प्रमुख मीन विश्वकर्माले भने ।

वक्ताका लागि पाँच मिनेट समय तय गरिएको विश्वकर्माले जानकारी गराए । समापन कार्यक्रम २ बजेबाट सुरु गर्ने गरी तयारी भइरहेको उनले बताए ।

सोमबार सुरु भएको उद्धघाट्नमा पदाधिकारीबाट तीन जना मात्रै बोलेका थिए । सभापति शेरबहादुर देउवा, उपसभापति धनराज गुरुङ र सहमहामन्त्री महालक्ष्मी उपाध्याय ‘डीना’ले विचार राखेका थिए ।

चारदिनका लागि तय भएको महासमिति बैठक आज सकिँदैछ । महासमिति बैठकमा प्रस्तुत भएका प्रतिवेदन माथि बुधबार र विहीबार प्रतिनिधिहरुसँग सुझाव लिइएको थियो ।