सातै प्रदेशका मुख्यमन्त्री पनि हेरफेर गर्ने नयाँ गठबन्धनको तयारी
राष्ट्रियसभाको अध्यक्ष र उपाध्यक्षमा फेरिन सक्ने
२१ फागुन, काठमाडौं । नयाँ गठबन्धनका शीर्ष नेताहरूले सातै प्रदेशका मुख्यमन्त्री पनि हेरफेर गर्ने तयारी गरेका छन् । सोमबार प्रधानमन्त्रीको सरकारी निवास वालुवाटारमा जारी बैठकले प्रदेशका मुख्यमन्त्रीहरू पनि हेरफेर गर्ने तयारी गरेको बैठकमा सहभागी माओवादी सचिव देवेन्द्र पौडेल बताएका छन् ।
उनका अनुसार नयाँ गठबन्धनमा आवद्ध दलहरुलाई समेटेर आजै सानो आकारको मन्त्रिपरिषद् गठन हुनेछ ।
यस्तै राष्ट्रियसभा अध्यक्ष र उपाध्यक्षमा पनि नयाँ सहमति खोज्ने उनको भनाइ छ । उनले भने, ‘प्रदेशका मुख्यमन्त्रीहरु आलोपालोको आधारमा हेरफेर गरेर अगाडि बढाउने सहमती गर्ने कुरा भएको छ।’ एमालेले ३ र माओवादी केन्द्रले २ वटा प्रदेशको नेतृत्व लिनेबारे दलहरुबीच प्रारम्भिक छलफल भइरहेको छ । बाँकी दुई प्रदेशको नेतृत्व गठबन्धनका अन्य दललाई दिने तयारी छ ।
उनका अनुसार नयाँ गठबन्धनमा एकीकृत समाजवादीलाई पनि समेटेर लैजान पहल गर्ने माओवादीको निर्णय छ ।
कांग्रेससँग गठबन्धन टुटेपछि नयाँ गठबन्धनका नेताहरु छलफलमा जुटेका छन् । बालुवाटारमा अहिले माओवादी केन्द्र, नेकपा एमाले र राष्ट्रिय स्वतन्त्र पार्टी (रास्वपा)का नेताहरुको बैठक बसिरहेको छ ।
त्यसअघि प्रधानमन्त्री प्रचण्डले आफ्नो पार्टीका नेताहरुसँग छलफल गरेका थिए ।
प्रतिक्रिया दिनुहोस्