बारामा तेल ट्यांकरले मोटरसाइकलमा ठक्कर दिँदा प्रहरी जवानको मृत्यु

४ वैशाख, बारा । बाराको जितपुर सिमरा उपमहागरपालिकामा तेल ट्यांकरले मोटरसाइकलमा ठक्कर दिँदा एक प्रहरी जवानको मृत्यु भएको छ ।

मृत्यु हुनेमा जिल्ला प्रहरी कार्यालय पर्सामा कार्यरत प्रहरी जवान २९ वर्षीय दिनेश परियार छन् ।

सोमबार राति १० बजेर ४० मिनेटको समयमा परियार चढेको ग १४ प ५९७२ नम्बरको मोटरसाइकललाई सोही दिशा तर्फ जादै गरेको ना ७ ख ३०२६ न.को तेल ट्याङकरले जितपुरसिमरा उपमहानगरपालिका २ सञ्चार नजिक पथलैयाबाट विरगंज तर्फ जाँदै गरेको बेला पछाडिबाट ठक्कर दिएको थियो ।

उनको उपचारको क्रममा परवानीपुर स्थित एल एस न्युरो हस्पिटलमा राति १ बजे २२ मिनेटमा मृत्यु भएको जिल्ला प्रहरी कार्यालय बाराले जनाएको छ ।