हङकङविरुद्ध नेपालको खराब सुरूवात

८ वैशाख, काठमाडौं । नेपालले ओमानमा जारी एसीसी प्रिमियर कप २०२४ मा तेस्रो स्थानको प्रतिस्पर्धामा हङकङसँग खराब सुरूवात गरेको छ ।

अल अमरेत क्रिकेट मैदान १ मा टस जितेर पहिला ब्याटिङ रोजेको नेपालले ८ ओभरमा ४ विकेट गुमाउँदै ५१ रन बनाएको छ । सन्दीप जोरा ८ र कुशल मल्ल १ रनमा क्रिजमा छन् ।

नेपालका ओपनर कुशल भुर्तेल शून्य, आसिफ शेख ५, सोमपाल कामी १२ र कप्तान रोहित २१ रनमा आउट भए । खराब लयबाट गुज्रिएका ओपनर कुशल भुर्तेल आज पनि चल्न सकेनन् ।

तीव्र गतिका बलर आयुश शुक्लाको पहिलो ओभरको दोस्रो गुड लेन्थको बलमा विकेटकिपर जिशान अलीबाट क्याच आउट हुन पुगे । लगातार तीन खेलमा शून्यमा आउट भएका हुन् । यसअघि समूह चरणमा साउदी अरेविया र सेमिफाइनल खेलमा युएईसँग शून्यमै आउट भएका थिए ।

कुशल आउट भएपछि तेस्रो नम्बरमा सोमपाल कामीलाई पठाएको थियो । सोमपाल शुक्लाको बलमा ७ बलमा २ चौका प्रहार गर्दै आउट भए ।

ओपनर आसिफ शेख शुक्लाको पाँचौं ओभरको पाँचौं बलमा खराब सट खेल्दै क्याच आउट भएपछि नेपाल ३२–३ को अवस्थामा पुगेको थियो ।

युएईसँगको खेलमा १८ बलमा ५ रन बनाउँदै आउट भएका कप्तान रोहित आज पनि चल्न सकेनन् । अतिक इकबालको आठौं ओभरको पाँचौं बलमा रोहित २१ रनमा एलबीडब्लू आउट भए ।

रोहितले १९ बलमा २ चौका प्रहार गरे । यस खेलको विजेताले इमर्जिङ टिम्स एसिया कप खेल्न पाउनेछन् ।