सुहाङलाई ३ हजारको अग्रता, डम्बरलाई पछ्याउँदै डकेन्द्र
१७ वैशाख, काठमाडौं । प्रतिनिधि सभा सदस्यका लागि इलाम-२ मा भएको उपनिर्वाचनमा एमालेका सुहाङ नेम्वाङले अग्रता अन्तर बढाउँदै लगेका छन् ।
फाकफोकथुम गाउँपालिका र चुलाचुली गाउँपालिकाका सबै वडा र माङसेबुङ वडा नम्बर १ को मत गणना सकिँदासम्म नेम्वाङ ३ हजार मतले अगाडि छन् ।
नेम्वाङले १० हजार ३ मत पाएका छन् भने उनलाई पछ्याइरहेका नेपाली कांग्रेसका डम्बर खड्काले ६ हजार ९४४ मत ल्याएका छन् ।
पहिचान पक्षधर स्वतन्त्र उम्मेदवार डकेन्द्र थेगिम ५ हजार ५९१ मतसहित तेस्रो स्थानमा छन् । रास्वपाका उम्मेदवार मिलन लिम्बुले १ हजार ४४३ मत पाएका छन् ।
एकीकृत समाजवादीका जितबहादुर राईले २ सय ५८ मत पाएका छन् । मंगोल नेसनल अर्गनाइजेसनका मनिबहादुर लिम्बुले २ सय २९ र जनमतका प्रेमकुमार थाम्सुहाङले ५९ मत पाएका छन् ।
डाकप्रसाद गौतमले शून्य मत पाएको निर्वाचन आयोगले जनाएको छ । इलाम नगरपालिका-७ इलाम घर भएका गौतम स्वतन्त्र उम्मेदवार हुन् । उनले महिला चुनाव चिन्ह पाएका थिए ।
१० मत पनि नकटाउने उम्मेदवार ५ जना रहेको आयोगले जनाएको छ ।
इलाम-२ मा तत्कालीन प्रतिनिधि सभा सदस्य सुवास नेम्वाङको निधन भएपछि उपनिर्वाचन भएको हो । उपनिर्वाचनमा १९ जना उम्मेवार मैदानमा छन् ।
प्रतिक्रिया दिनुहोस्