रातो मच्छिन्द्रनाथको रथयात्रा सुरू (तस्वीरहरु)

२९ वैशाख, ललितपुर । रातो मच्छिन्द्रनाथको रथयात्रा शनिबारदेखि सुरू भएको छ । आज ललितपुरको पुल्चोकबाट रथारोहण गरी मच्छिन्द्रनाथको रथयात्रा सुरू भएको हो ।

रथलाई गाःबाहल, मंगलबजार, सुन्धारा, लगनखेल, इटिटोल हुँदै जावलाखेलमा पुर्‍याएर भोटो देखाइनेछ । यससँगै मच्छिन्द्रनाथलाई सानो खटमा राखी बुंगमतीमा लगिएपछि जात्रा समापन हुनेछ ।

किंवदन्तीअनुसार भिक्षा माग्न आएका गोरखनाथलाई कान्तिपुरवासीले नदिएपछि त्यसैको झोँकमा उनले पशुपति मृगस्थलीमा नवनागलाई आसन बनाएका थिए ।

यसरी १२ वर्षसम्म वर्षा नभई अनिकाल भएपछि यसको समाधान खोज्दै जाँदा गोरखनाथका गुरु मच्छिन्द्रनाथलाई कान्तिपुर ल्याएमा गोरखनाथ आसनबाट उठी वर्षा र सहकाल हुने थाहा पाएर भक्तपुरका राजा नरेन्द्रदेव, काठमाडौंका राजा बन्धुदत्त बज्राचार्य र ललितपुरका कृषक ललित चक्रधर मिलेर मच्छिन्द्रनाथलाई भारतको कामारुकामाक्षबाट नेपाल ल्याएका थिए ।

शनिबार रथयात्रा हेर्नका लागि ललितपुर महानगरपालिकाका नगरप्रमुख चिरीबाबु महर्जनको निमन्त्रणामा युरोपेली युनियन, फ्रान्स, इजरायल, नर्वे, दक्षिणकोरिया, स्विट्जरल्याण्ड, थाइल्याण्ड, संयुक्त अधिराज्य लगायत देशका राजदूत र विश्व बैंक, युनिसेफ, युएसएआईडी, एसियाली विकास बैंक लगायत निकायका प्रतिनिधिहरु आएका छन् ।

हेर्नुहोस् थप तस्वीरहरू :