ओली बा, दुई तिहाई त गिरीबन्धु ठग्न पो काम लागेछ ?
त्रिचन्द्रअगाडि नेविसंघको प्रदर्शन, २० जना पक्राउ
२ जेठ, काठमाडौं । नेपाल विद्यार्थी संघ (नेविसंघ) ले सहकारी ठगी र गिरीबन्धु टी-इस्टेट नीतिगत भ्रष्टाचारमा संलग्नमाथि कारबाही माग गर्दै प्रदर्शन गरेको छ ।
सहकारीको बचत अपचलन र गिरीबन्धु टी-इस्टेटमा भएको नीतिगत भ्रष्टाचारमा संलग्न रहेकाहरूमाथि कानुनी कारबाहीको माग गर्दै नेविसंघ त्रिचन्द्र क्याम्पसले बुधबार बिहान काठमाडौंको घण्टाघरअगाडि प्रदर्शन गरेका हुन्। प्रदर्शन गर्ने नेविसंघका २० जना कार्यकर्तालाई प्रहरीले नियन्त्रणमा लिएको छ ।
सहकारीमा नागरिकहरूले गरेको बचत अपचलन, ठगी र दुरूपयोग भए पनि सरकार गम्भीर नभएकोले प्रदर्शन गरेको नेविसंघका नेता गोविन्द कोइरालाले बताए।
उनीहरूले ‘गुड मर्निङ केपी बा, चिया खानुभो?, गृहमन्त्रीज्यू सहकारी ठग र गिरीबन्धु ठगलाई टुँडीखेलमा राखेर नाकको डाँडी भाँचिने गरी हान्नु है, केपी ओली सहकारी ठगको प्रवक्ता, रबि दाई खै जीबी राई ?, ओली बा, दुई तिहाई त गिरीबन्धु ठग्न पो काम लागेछ ? ‘ लेखिएको प्ला कार्डसहित प्रदर्शन र नाराबाजी गरेका थिए।
गिरीबन्धु टी-इस्टेटबारे पनि छानबिन गर्न माग गरिएको उनीहरूले बताएका छन् ।
सहकारी प्रकरणमा उपप्रधान तथा गृहमन्त्री रवि लामिछाने संलग्न रहेको भन्दै नेपाली कांग्रेसले सदनमा अवरोध गर्दै आएको छ भने संसदीय छानबिन समिति गठनको माग गरिरहेको छ।
यता, कांग्रेसले सदनमा अवरोध गरिरहेका बेला भ्रातृ संस्था नेविसंघ, तरूण दल र नेपाल महिला संघले सडकमा सहकारी प्रकरणलाई लिएर प्रदर्शन गर्दै आएका छन्।
प्रदर्शन गरेका नेविसंघका २० जना कार्यकर्तालाई प्रहरीले नियन्त्रणमा लिएको छ ।
हेर्नुहोस् थप तस्वीरहरू :
प्रतिक्रिया दिनुहोस्