मोदीसँग सन्तुष्ट छैन आरएसएस !
![](https://www.ratokagaj.com/wp-content/uploads/2024/06/Narendra-Damodar-dash-Modi-take-oath-as-PM-Cover.jpg)
२ असार, काठमाडौँ । भारतीय चुनावमा भाजपाले बेहोरेको क्षतिबारे राष्ट्रिय स्वयंसेवक संघका प्रमुखले दिएको टिप्पणी यति बेला चर्चामा छ, जहाँ उनले सरकारी पक्षबाट संयम, मर्यादा नराखी उग्रता देखाइएको भन्दै आलोचना गरेका छन् ।
भारतको लोकसभा चुनावमा सत्तारुढ भाजपाको तुलनात्मक कमजोर नतिजासँग उसको मातृपार्टी राष्ट्रिय स्वयंसेवक संघ (आरएसएस) असन्तुष्ट रहेको देखिएको छ ।
कतिपयले यसलाई नतिजापछिको असन्तोष नभई दिल्ली र नागपुरबीच केही वर्षयता सुषुप्त शक्तिको द्वन्द्वको प्रकटीकरणमात्रै मानेका छन् ।
नागपुर, जहाँ आरएसएस मुख्यालय छ । अनि दिल्ली, जहाँबाट नरेन्द्र मोदीले सरकार चलाउँछन् ।
आरएसएसका एक सयभन्दा बढी मातहत संस्था छन्, जसको राजनीतिक इकाई भाजपा अर्थात् भारतीय जनता पार्टी हो ।
१० वर्षअघि नरेन्द्र मोदी नेतृत्वमा सत्तारुढ बनेसँगै भाजपाले एक व्यक्तिको ब्रान्डिङमा सिंगो ऊर्जा खर्चेको, आफ्नो मूल शक्तिको स्रोत अर्थात् मातृपार्टी आरएसएसलाई उपेक्षा गर्न थालेको भन्दै संघ परिवार मोदी टिमसँग क्षुब्ध छ ।
यसको पछिल्लो दृष्टान्त आरएसएस प्रमुख मोहन भागवतले गरेको टिप्पणी हो, जसको बारेमा अहिले भारतमा विशेष चर्चा भइरहेको छ ।
मणिपुरको चुनावी अभियानमा भाजपा विपक्षीविरुद्ध उग्र रुपमा प्रस्तुत भएकोमा आरएसएसले आपत्ति जनाएको थियो ।
प्रतिक्रिया दिनुहोस्