भदौमा सेयर बजारले गुमायो ४२० अंक, यी हुन् मूल्य धेरै घटेका कम्पनी

१ असोज, काठमाडौं । साउनको अन्तिम कारोबार दिन ३००० अंक पुगेको बजार अन्ततः भदौ अन्तिम दिन २५८० अंकमा बन्द भयो । भदौ महिनामा बजारमा भारी गिरावट देखियो । एक महिनामा बजार १४ प्रतिशतले घटेको छ । आजभन्दा भोलि, भोलिभन्दा पर्सि पोर्टफोलियो घटिरहेपछि कतिपय लगानीकर्ता आत्तिएर सेयर बेचेर बाहिरिँदा बजारले भदौमा ठूलै अंक गुमाउन पुग्यो ।

साउन महिनामा बजार ७६० अंक बढेको थियो । असार अन्तिममा २२४० अंक रहेको बजार साउन अन्तिममा ३००० पुगेको थियो । बजारलाई बढी प्रभाव पार्ने पक्षहरु सकारात्मक रहेकाले खरिदको मौका रहेको लगानीकर्ता बताउँदै आएका छन् ।

घट्दो ब्याजदर, बैंकहरुमा पर्याप्त लगानीयोग्य रकम रहेकाले बजार घट्नु खरिदको मौका रहेको नेपाल इन्भेस्टर्स फोरमका अध्यक्ष तुलसीराम ढकालले बताए । ‘बजार कतिसम्म घट्छ भनेर ठ्याक्कै कसैले भन्न सक्दैन, तर घटेका बेला जोखिम कम हुने भएकाले खरिदको राम्रो अवसर हो’ उनले भने ‘बजार सधैं घट्ने पनि हुँदैन, सधैं बढिरहने पनि हुँदैन । घटेका बेला किनेर बस्ने र बढेका बेला नाफा बुक गर्नेले नै कमाउने हो ।’

बजार बढ्दा जुन जुन कम्पनीको मूल्य उच्च दरमा बढेको थियो, घट्दा पनि तिनै कम्पनीको मूल्य उच्च दरमा घटेको देखिन्छ । भदौ महिनामा मूल्य धेरै घट्ने कम्पनीमा नेपाल फाइनान्स छ । सो कम्पनीको मूल्य ३४ प्रतिशतले घटेको छ । साउन अन्तिममा प्रतिसेयर मूल्य २०७० रहेकोमा भदौ अन्तिममा १३६० रुपैयाँमा झरेको छ ।

भदौमा मूल्य उच्च दरमा घटेका १० कम्पनी