स्याउबाट एक करोड आम्दानी

१ असाेज,  काठमाडौँ । जिल्लाको पूर्वीउत्तर क्षेत्रमा पर्ने स्वामीकार्तिक खापर गाउँपालिकाका किसानले यो वर्ष स्याउ बिक्री गरेर एक करोडभन्दा बढी रुपियाँ आम्दानी गरेका छन् । स्वामीकार्तिक खापर गाउँपालिकामा रहेका दुई हजार चार सय घरपरिवारमध्ये एक हजार आठ सय घरपरिवारले यो वर्ष स्याउ बिक्री गरेर गाउँमै एक करोडभन्दा बढी आम्दानी गरेका हुन् ।

स्वामीकार्तिकमा उत्पादन भएको झन्डै ८० प्रतिशत स्याउ बिक्री भएको छ । स्याउ बिक्रीबाट यहाँका किसानले झन्डै ८० लाख रुपियाँ आम्दानी गरेको र अझै २५ लाखभन्दा बढीको स्याउ सेलार स्टोरमा जम्मा गरेको कृषि शाखा प्रमुख विनोद शाहीले बताए । उनले भने, “२५ टन स्याउ बारीबाट टिपेर सेलार स्टोरमा राखिएको छ । केही दिनपछि यो स्याउ पनि बिक्रीका लागि देशका विभिन्न सहरमा लाने योजना रहेको छ ।”