‘छठ वैदिककालदेखिको पर्व हो’

२३ कात्तिक, चन्द्रपुर (रौतहट) । नेपाली कांग्रेसका महामन्त्री गगन थापाले छठपर्व वैदिककालदेखिको पर्व भएको बताएको छ । बिहीबार साँझ रौतहट आउनुभएका महामन्त्री थापाले रौतहटको चन्द्रनिगाहपुरमा आयोजित छठको शुभकामना आदान कार्यक्रममा यस्तो बताएको हो ।

आफू अहिले मधेसमा छठको अवसरमा परिवारसहित मठमन्दिर दर्शन गर्ने उद्देश्यले आएको बताउँदै महामन्त्री थापाले काठमाडौँको कमलपोखरीमा छठघाट बनाएको स्मरण गरेको थियो । बूढापाकाका भनाइअनुसार हिन्दूहरूले छठपर्व वैदिककालदेखि मनाउँदै आएको हुँदा यो पर्व देशव्यापी रूपमा मनाउन थालिएको महामन्त्री थापाले बताए ।

“सबैले देशको भाषा, संस्कृति तथा धर्मका बारेमा जान्न अति जरुरी छ,” महामन्त्री थापाले भने, “यही कुरा सिकाउन पनि आफू श्रीमती र छोरीसहित छठ हेर्न मधेस झरेको हुँ ।” उ बिहीबार विभिन्न जिल्ला हुँदै रौतहटबाट वीरगञ्ज गएको नेविसङ्घ रौतहटका पूर्वअध्यक्ष श्यामहरि चौलागाईँले जानकारी दिए ।

शुभकामना आदानप्रदान कार्यक्रममा कांग्रेस मधेस प्रदेशका सभापति कृष्णा यादव, रौतहट जिल्ला सभापति तथा मधेस प्रदेशका अर्थमन्त्री जितेन्द्र यादव, रौतहट क्षेत्र नं ४ का सांसद देवप्रसाद तिमिल्सिना, रौतहटको चन्द्रपुर नगरपालिकाका नगरप्रमुख सञ्जयकुमार काफ्ले, गढीमाई नगरपालिकाका प्रमुख श्याम यादव, परोहा नगरपालिकाका प्रमुख शेख वकिल, राजपुर नगरपालिकाका प्रमुख रजिक आलमलगायत कांग्रेसका नेताहरूको सहभागिता थियो ।