फोर नेसन्स कप : किर्गिस्तानलाई नेपालले १-० ले हरायो

फाल्गुन ५, काठमाडौँ । विमला चौधरीले पहिलो हाफमा गरेको एक मात्र गोलमा नेपालले फोर नेसन्स कपमा किर्गिस्तानलाई १–० ले हराएको छ । दशरथ रंगशालामा भएको खेल पूर्णतः नेपालको नियन्त्रणमा रहे पनि गोलका लागि संघर्षरत रहेको थियो ।

विमलाले ११ औं मिनेटमा हेडबाट गोल गरेकी थिइन् । त्यसमा सविता रानामगरले क्रस उपलब्ध गराएकी थिइन् । नेपालका लागि विमलाको यो दोस्रो व्यक्तिगत गोल हो । उनले यसअघि सन् २०२१ मा फिलिपिन्सविरुद्ध गोल गरेकी थिइन् ।

नेपालले दोस्रो हाफमा सावित्रा भण्डारीलाई मैदानमा प्रवेश गराए पनि उनी पनि गोल गर्नबाट चुकिन् । किर्गिस्तानका लगभग सबै खेलाडी रक्षापंक्तिमै रहे र उनीहरूले नेपालविरुद्ध एउटै पनि आक्रमण बुन्न सकेनन् ।

यसअघि नेपालले किर्गिस्तानविरुद्धको एक मात्र खेलमा ८–२ ले पराजित गरेको थियो । सन् २०१९ मा नेपालले यो जित हासिल गरेको थियो । अब नेपालले प्रतियोगिताको आफ्नो दोस्रो खेलमा लेबनानको सामना गर्नेछ ।