खुद्रा तरकारी व्यापारी भन्छन् प्रहरी र भन्सार कार्यालय मिलेर दुःख दियो !

बैशाख १०, बर्दिया । कैलाली जिल्लाको टीकापुर नगरपालीका वडा नम्बर पाँच बसन्तपुरका अरुण चौधरी तरकारी व्यापारी हुन् । उनले स्थानीय बजारमा खुद्रा तरकारीको व्यापार गर्दै आएका छन् । उनको दैनिकी नै अटोमा तरकारी बोकेर विभिन्न हाटबजार पुगेर व्यापार गर्ने हो । उनी खुन पसिना एक गरेर खाई नखाई व्यापार गर्न सहज होस् भनेर केही समय अगाडी मात्रै अटो जोडेका थिए ।

त्यहीँ अटोमा तरकारी बोकेर कहिले बर्दियाको राजापुर हाटबजार त कहिले कैलाली टीकापुरको स्थानीय हाटबजारमा पुगेर तरकारी बेच्दै आएका थिए । गत बिहिबार अरुण बर्दिया हाटबजारबाट उबे्रका तरकारी अटोमा लिएर टीकापुर फर्किदै थिए ।

फर्किने क्रममा बर्दियाको भालुफाँटामा प्रहरीले चेकिङ गर्ने क्रममा तरकारी खरिद गरेको रसिद मागे । तर अरुणले राजापुर हाटबजारबाट तरकारी बेचेर फर्किन लागेको बताउदै आफुले बेच्ने तरकारी स्थानी किसानहरुको खेतबारीमा पुगेर किन्ने भएकाले खरिद गरेको रसिद नभएको बताए ।

प्रहरीले खरिद गरेको रसिद नभएको भन्दै गाडी र तरकारी दुबै जफत गरेर राजापुर भन्सार कार्यालयमा बुझाईदिए ।

कस्तो बिडम्बना देशभित्रै खरिद गरेको त्यो पनि स्थानीय किसानको खेतबारीमा पुगेर खरिद गरेको तरकारीको रसिद दिन नसक्दा तरकारी त तरकारी, तरकारी सहितको सवारीसाधन नै जफत गरेर भन्सार कार्यालयमा बुझाईदिएका थिए ।

पिडित आशा रानी चौधरीले इन्डियाबाट नभएर किसानको खेतबारीबाट तरकारी किनेर ल्याएकाले किनेको रसिद नभएको बताएकी छन् । उनले कैलाली र बर्दियाका स्थानीय बजारमा पुगेर खुद्रा तरकारी व्यापार गर्दै आएको बताईन् । उनले उक्त दिन पनि राजापुर हाटबजारबाट नबिकेका तरकारी अझ कुहिएको गोलभेडा र बन्दा समेत गाडीमा राखेर घर लैजानेक्रममा ईन्डियाबाट भन्सार छलि गरेर ल्याएको भन्दै गाडी सहित जफत गरेको उनको भनाई छ ।

राजापुर भन्सार कार्यालय बर्दियाका भन्सार अधिकृत धनबहादुर शाहीले प्रहरीले भन्सार कार्यालयमा अटो सहितको तरकारी बुझाएको बताएका छन् । शाहीले केही दिनमा १५ दिनको हकदाबी सुचना निकाल्ने र हकदाबी गर्न आउनेले बरामद भएको समान बराबर धरौटी राखेपश्चात मुद्धा लड्ने पाउने बताए । उनले मुद्धा जिते पिडितले जफत भएका समान फिर्ता पाउने र मुद्धा हारे जफत भएको समान सरकारीकरण हुने बताए ।

पिडितले ईन्डियाबाट नभएर नेपालमै तरकारी किनेको बताए पनि प्रहरीले खरिद रसिद नभेटाएकै कारण भन्सारमा बुझाउनुले सानालाई ऐन ठुलालाई चैन जस्तै भएको छ । सेटिङमा बार्षिक अर्बौ रकम बराबरको भन्सार छली हुँदा पनि सम्बन्धित निकाय चै चुप मै चुपको अवस्थामा छन् ।

तर घर चलाउन दैनिक उपभोग्यका बस्तु केही किलो समान ल्याउदा समेत सिमामा सुरक्षाकर्मीबाट सर्वसाधारणले दुव्र्यवहार खेप्नुपरेको घटना बेलाबखत बाहिरिदै आएको छ ।

थप समाचारहरु

संरक्षणको पर्खाइमा दाङको ‘नमूना थारूग्राम’ तिलौराकोट विश्व सम्पदा सूचीमा सूचीकृत हुने अन्तिम चरणमा : मन्त्री किराती गौतमबुद्ध विमानस्थलबाट अन्तर्राष्ट्रिय उडानका लागि भैरहवाका व्यवसायीले मागे देउवासँग सहयोग देशभरि गर्मी बढ्यो, भैरहवाको तापक्रम ४३.६ डिग्री अर्घाखाँचीका किसानलाई कफीखेती तालिम बाँकेको फत्तेपुरका एक सय २६ घरमा स्वच्छ पेयजलको सुविधा