अत्तरियाको बौराहामा पुल बनेपछि खुसी छन् स्थानीय

२३ वैशाख, अत्तरिया । कैलालीको घोडाघोडी नगरपालिका–२ चितालपुरस्थित बौराहा नदीमा पुल बनेपछि स्थानीय खुसी भएका छन् ।

प्रदेश सरकारको चालु आर्थिक वर्षको रु सात करोड १९ लाख २९ हजार आर्थिक सहयोगमा पूर्वाधार विकास कार्यालय कैलालीमार्फत पक्की पुल निर्माणपछि स्थानीय खुसी भएका हुन् ।

वडा नं २ का अध्यक्ष लक्ष्मीप्रसाद चौधरीले वर्षौसम्म जोखिमपूर्ण यात्रा गर्न बाध्य स्थानीय पुल बनेपछि आवतजावतमा सहज भएको बताए ।

उनले भने,“यहाँ पुल नहुँदा स्थानीयलाई दैनिक कामकारवाहीमा समस्या हुनुका साथै यहाँका विद्यार्थीलाई वर्षायाममा विद्यालय आवतजावतमा निकै समस्या हुने गरेको थियो । वर्षौदेखि भोग्दै आएको समस्या समाधान भएपछि हामी सबैलाई सहज भएको छ।”

पूर्वाधार विकास कार्यालय कैलालीका सूचना अधिकारी विनोद खड्काले चितालपुरदेखि सोही वडाको जोकाहासम्म जोड्ने गरी २५ मिटर लामो पुल निर्माण भएको बताए । यस्तै, सोही पालिकाको वडा नं ८ तारानगरस्थित बौराहा नदीमा निर्माणाधिन अर्को पुलको काम पनि अन्तिम चरणमा रहेको सूचना अधिकारी खड्काले जानकारी दिए।

रु सात करोड ६४ लाख ५० हजार लागतमा निर्माणाधीन सो पुलको ८५ प्रतिशत काम सम्पन्न भइसकेको छ । विसं २०८० फागुन २९ गतेसम्म निर्माण सम्पन्न गर्नेगरी सम्झौता भए पनि निर्धारित समयमा कामसम्पन्न नहुँदा आगामी असार मसान्तसम्म म्याद थप गरिएको छ ।

थपिएको समयभित्रै पुल निर्माण गर्नेगरी हाल निरन्तर काम भइरहेको पनि खड्काले जानकारी दिए ।

थप समाचारहरु

महाकाली नदीमा पानीको सतह बढेपछि शारदा ब्यारेजमा सवारी आवतजावतमा रोक १६ दिनदेखि अध्यारोमा बास, अर्कोतर्फ बाढीको त्रास सुदूरपश्चिममा आज ‘ठूली गौरा’ पर्व मनाइँदै बैतडीमा वैद्यको भर पर्दा सर्पले टोकेकी महिलाको मृत्यु तिङ्करमा सशस्त्र प्रहरीको बिओपी स्थापना शुक्लाफाँटा आरक्ष पीडितको माग सम्बोधन गर्न न्यायिक आयोग गठन