मान्छे मार्ने बाघ नियन्त्रणमा !
कञ्चनपुर — दोधारा चाँदनी नगरपालिका–२ मा महिलामाथि आक्रमण गर्ने बाघ दोस्रो दिन नियन्त्रणमा आएको छ । बिहीबारदेखि खोजी सुरु भएको बाघ शुक्रबार नियन्त्रणमा आएको हो ।
‘बाघ नियन्त्रणमा लिइसकेका छौं, गाडीमा लोड भइसकेको छ,’ निकुञ्जका संरक्षण अधिकृत मनोज ऐरले भने, ‘अब निकुञ्जको कार्यालयमा लगेर सबै स्वास्थ्य परीक्षण गरिनेछ ।’ उनका अनुसार बाघलाई एउटा डार्ट सुई लागेपछि बेहोस भएको हो ।
बिहीबार बिहान धान खेतमा घाँस काटिरहेकी महिलामाथि आक्रमण गरेर बाघले ज्यान लिएको थियो । त्यसपछि निकुञ्जले नियन्त्रणमा लिने प्रयास सुरु गरेको हो । बाघलाई नियन्त्रणमा लिनका लागि बिहीबार ४ वटा हात्ती र प्राविधिक टोली परिचालन भएको थियो । ४ घण्टासम्म प्रयास गर्दा पनि बाघलाई नियन्त्रणमा लिन सकिएको थिएन । शुक्रबार थप १ हात्ती प्रयोग गरेर ५ हात्तीसँगै प्राविधिक परिचालन गरेपछि बाघ नियन्त्रणमा आएको हो ।
प्रतिक्रिया दिनुहोस्