जब १८ वर्षीय महिलाले तीन बच्चाको जन्म दिइन्

१२ भाद्र,  काठमाडौँ । रुकुमपश्चिमको सानीभेरीमा रहेको गाउँपालिका अस्पतालमा एक महिलाले १८ वर्षको उमेरमा तीन जना बच्चाको जन्म दिएकी छन । चौरजहारी नगरपालिका १४ घर भइ हाल सानीभेरी गाउँपालिका ८ स्थित माइती घरमा बस्दै आएकी १८ वर्षीया कौशिला पुनले तिम्ल्याह बच्चा जन्माएकी हुन ।

अस्पतालका स्टाफ नर्स अम्बिका ओलीका अनुसार आज (मंगलबार) बिहान ८:१५, ८:३७ र ९:०० बजे पुनले तीन बच्चा जन्माएकी हुन । जन्मिएका नवजात शिशु दुई छोरी र एक छोरा रहेका छन। स्टाफ नर्स ओलीका अनुसार पुनले समय पुरा नहुँदै (करिब २८ हप्तामै)  तीन बच्चाको जन्म दिएकी छ्न । सामान्यतया ४० हप्ताको अवधिमा बच्चाको जन्म हुने आँकलन गरिएको हुन्छ।

सुत्केरी व्यथा लागेर आफै अस्पताल पुगेकि पुनको स्वास्थ्य अवस्था भने सामान्य रहेको छ। सुरुमा जन्मिएका दुई छोरीको अवस्था सामान्य र तौल एक किलो रहेको छ भने अन्तिममा जन्मिएका छोराको तौल नौ सय ग्राम मात्र रहेको छ। तौल पनि कम र श्वासप्रश्वासमा केही समस्या देखिएपछि बच्चालाई अक्सिजनसहित सुविधासम्पन्न अस्पतालमा आवश्यक समन्वय गरेर पठाइएको छ ।

स्टाफ नर्स ओलीका अनुसार गाउँपालिका अस्पताल स्थापना भएयता तिम्ल्याह बच्चा जन्मिएको पहिलो पटक हो।