वीर अस्पतालका निर्देशक डा. पौडेलविरुद्ध जताततै उजुरी, छानबिन हुँदै

काठमाडौँ । वीर अस्पतालका निर्देशक डा. सन्तोष पौडेलमाथि गम्भीर प्रकृतिका आरोपसहित विभिन्न निकायमा उजुरी परेका छन् । आर्थिक अनियमितता र कानून विपरीतको कार्य गरेको गम्भीर आरोप लगाउँदै उनीविरुद्ध विभिन्न निकायमा उजुरी परेका हुन् ।

वीर अस्पतालमा भएको अनियमितताविरुद्ध प्रधानमन्त्री तथा मन्त्रिपरिषद्को कार्यालय, संसदको शिक्षा, स्वास्थ्य तथा सूचना प्रविधि समिति, राज्य व्यवस्था तथा सुशासन समिति, स्वास्थ्य तथा जनसङ्ख्या मन्त्रालय, अख्तियार दुरुपयोग अनुसन्धान आयोग, राष्ट्रिय सतर्कता केन्द्र लगायतका निकायमा उजुरी परेको हो ।

निर्देशक पौडेलमाथि लागेका आरोप
वीर अस्पतालका निर्देशक डा. सन्तोष पौडेलले कानून विपरीत कार्य गरेको आरोप लागेको छ ।

उपकरणहरू खरिद गर्ने क्रममा इस्टिमेट तयार गर्दा सीमित कम्पनीसँग मिली औसत लागतभन्दा बढी मूल्य कायम गरी खरिद गरेको, सहायक प्राध्यापक र उपप्राध्यापकको उपाधि पाउँदा गडबडी भएको भन्दै उनको सिफारिस तथा शैक्षिक प्रमाणपत्रहरूबारे छानबिन गर्न उजुरीमा माग गरिएको छ । कानूनी प्रावधान विपरीत निर्देशक डा. पौडेल एक निजी कम्पनीको सञ्चालक रहेको दाबी उजुरीमा गरिएको छ ।

ऐन, कानून विपरीत डा. पौडेल अल्का हस्पिटल फार्मेसी प्रा.लि. (कम्पनी दर्ता नम्बर २४८७८२/०७७/०७८)को सञ्चालक, अध्यक्ष तथा सदस्य (फरक–फरक समयमा) हुनुका साथै शेयरधनीको हैसियतमा रहेर काम गर्दै आएको आरोप उजुरीमा लगाइएको छ । डा. पौडेलमाथि नेपाल स्वास्थ्य सेवा ऐन, २०५३ को दफा ५९, नेपाल स्वास्थ्य सेवा नियमावली, २०५५ को नियम ११२, निजामती सेवा ऐन, २०४९ को दफा ४८ ‘क’, निजामती सेवा नियमावली, २०५० को नियम ११७ विपरीत अन्य कम्पनीको सञ्चालक, अध्यक्ष र सदस्यको रूपमा काम गरेको आरोप लागेको हो ।

भ्रष्टाचार निवारण ऐन, २०५९ को दफा १४, चिकित्सा विज्ञान राष्ट्रिय प्रतिष्ठान, शिक्षक नियमावली, २०७४ को नियम १०९ को प्रावधान विपरीत उनले काम गरेको आरोप लागेको हो । पौडेलविरुद्ध यसअघि पनि विभिन्न निकायमा उजुरी परेका थिए ।