इजरायलले लेबनानमा हवाई हमला गर्दा ८ जनाको मृत्यु

५ असाेज, काठमाडौँ  । इजरायलले लेबनानमा पछिल्लो २४ घण्टामा दोस्रो पटक हवाई आक्रमण गरेको छ।

लेबनानमा इजरायलले गरेको यो दोस्रो आक्रमण हो। राजधानी बेरुतको दहियाह क्षेत्रमा आक्रमण हुँदा कम्तिमा ८ जनाको मृत्यु भएको बीबीसीले जनाएको छ। साथै दर्जनौं घाइते भएको जनाइएको छ। यो हमलामा हिजबुल्लाहको शीर्ष सैन्य इकाई जिहाद काउन्सिलका सदस्य इब्राहिम अकिल पनि परेको जनाइएको छ।

अकिल सन् १९८३ मा बेरुतमा अमेरिकी मरीन ब्यारेकमा भएको आक्रमणको मामिलामा अमेरिकाको खोजी सूचीमा परेका थिए। इजरायलले एफ–३५ लडाकु विमानबाट यो हमला गरेको लेबनानी मिडिया रिपोर्टले दावी गरेका छन्। हमलामा हिजबुल्लाह लडाकुहरू रहेको एउटा भवनलाई निशाना बनाएको थियो।