सिक्रेटारमा ‘साझेदारी स्वास्थ्य बिमा’ कार्यक्रम

२१ मङ्सिर, भोजपुर । जिल्लाको अरुण गाउँपालिका–७ सिक्रेटारले ‘नागरिक साझेदारी स्वास्थ्य बिमा कार्यक्रम’ सञ्चालनमा ल्याएको छ । वडाले आर्थिक रूपमा कमजोर भएका तथा विपन्न नागरिकको स्वास्थ्य संवेदनशीलतालाई ध्यानमा राख्दै स्वास्थ्य बिमा कार्यक्रम सञ्चालनमा ल्याएको हो ।

गाउँपालिकाको यही मङ्सिर १२ गतेको कार्यपालिका बैठकको निर्णयअनुसार वडाले नागरिकको आवेदन सङ्कलन थालेको छ । कार्यपालिकाको निर्णयमा उल्लेख भएको आधारमा बिमा शुल्कको ७१ दशमलव ४३ प्रतिशत वडाले बेहोर्ने र बाँकी २८ दशमलव ५७ प्रतिशत नागरिक स्वयंले तिर्ने गरी आवदेन सङ्कलन थालिएको अरुण–७ का वडाध्यक्ष कुमार थापाले जानकारी दिए ।

कार्यक्रमले वडामा बसोबास गर्ने अति गरिब, विपन्न, दीर्घरोगी तथा अपाङ्गता भएका व्यक्तिलाई लक्षित गरेको उसले बताए । “हामीले गरिब तथा विपन्न परिवारलाई लक्षित गरेर नागरिक साझेदारी स्वास्थ्य बिमा कार्यक्रम सञ्चालनमा ल्याएका छौँ”, वडाध्यक्ष थापाले भने, “आर्थिक रूपमा कमजोर भएकाहरू कार्यक्रमबाट लाभान्वित हुने अपेक्षा लिएका छौँ ।”

राज्यले ज्येष्ठ नागरिक र ‘क’ वर्गका अपाङ्गता भएका नागरिकको निःशुल्क स्वास्थ्य बिमा गरिरहेको भए पनि गरिब तथा विपन्न परिवारलाई लक्षित गरेर वडाले शुल्क बेहोर्ने गरी पालिकाले कार्यक्रम सञ्चालनमा ल्याएको वडाध्यक्ष थापाले उल्लेख गरे ।

वडाले सञ्चालन गर्न लागेको नागरिक साझेदारी स्वास्थ्य बिमा कार्यक्रमअन्तर्गत वार्षिक रु तीन हजार पाँच सय तिर्दै आएका परिवारले अब रु एक हजार तिर्नु पर्नेछ भने वडा कार्यालयले रु दुई हजार पाँच सय बिमा शुल्क बापतको रकम तिर्नेछ ।

थप समाचारहरु

सोलुमा ‘ट्राभल हिस्ट्री’ नभएका व्यक्तिमा डेङ्गीको सङ्क्रमण पुष्टि प्रधानमन्त्रीबाट विपी कोइराला स्वास्थ्य विज्ञान प्रतिष्ठानका ६५७ विद्यार्थी दीक्षित कुपोषित बालबालिकालाई स्वस्थ बनाउँदै रुम्जाटार अस्पताल निःशुल्क उपचार गरेको प्रतिवेदन सात दिनभित्र पेस गर्न पत्राचार ‘प्लान्ट’बाट निस्केको धुवाँले वातावरणमा असर स्वास्थ्य केन्द्र स्थापनाले टेम्केमैयुङवासीलाई सहज