झापामा राष्ट्रपति रनिङ शिल्ड खेलकुद प्रतियोगिताको तयारी पूरा

२२ फागुन, झापा । जिल्लास्तरीय १५ औँ राष्ट्रपति रनिङ शिल्ड खेलकुद प्रतियोगिताको तयारी पूरा भएको छ । जिल्ला खेलकुद विकास समितिका अनुसार राष्ट्रिय खेलकुद परिषदको आयोजना र झापा जिल्ला खेलकुद विकास समितिको आयोजनामा आगामी फागुन २३, २४ र २५ गते मेची रंगशालामा प्रतियोगिता हुँदैछ ।

जिल्लाका स्थानीय तहका विद्यालयहरुबाट प्रतिस्पर्धा गरी छनोट भएका माध्यमिक तहमा अध्ययनरत १४ देखि १८ वर्षसम्मका खेलाडीहरुले ६ वटा विधामा प्रतिस्पर्धा खेलकुद विकास समितिका अध्यक्ष प्रसान्त भण्डारीले बताए ।

यस वर्ष एथलेटिक्स (छात्र /छात्रा), भलिबल (छात्र/छात्रा), कबड्डी (छात्र/छात्रा), कराते (छात्र/छात्रा), तेक्वान्दो (छात्र/छात्रा) र उसु (छात्र/छात्रा) खेल हुने उनले जानकारी दिए । प्रत्येक टिममा छ विधाका करिब १२५ जना खेलाडी तथा अफिसियल गरी करिब दुई हजारजनाको जमघट मेची रंगशालामा रहन अध्यक्ष भण्डारीले बताए ।

प्रतियोगिताका लागि खेलको विधा अनुसार मेची रंगशालालाई व्यवस्थित बनाइएको उनको भनाई छ । यसअघिको राष्ट्रपति रनिङ शिल्ड प्रतियोगिता अर्जुनधारामा गराइएको थियो ।
प्रतियोगिताबाट विजेता खेलाडीहरु छनोट भई झापा जिल्लाको टिम बन्नेछ । करिब १२५ जनाको झापा टिम कोशी प्रदेशस्तरीय प्रतियोगितामा सहभागी बन्ने उनले बताए ।

प्रतियोगिता सम्पन्न गर्न रु. १० लाख खर्च लाग्ने अनुमान गरिएको छ । यद्यपि, सम्बन्धित निकायहरुबाट हालसम्म कुनै पनि बजेट प्राप्त नभइसकेको कार्यालयले जनाएको छ । बजेट नआए पनि उद्योगी–व्यवसायी, खेलकुदप्रेमी, दाताहरुसँग सहयोग जुटाएर प्रतियोगिता सम्पन्न गरिने अध्यक्ष भण्डारीले बताए । राष्ट्रपति रनिङ शिल्डमा सामेल नभए पनि जिल्लामा उल्लेख्य खेलाडी रहेको आईटीएफ तेक्वान्दोको पनि प्रतियोगितात्मक प्रतिस्पर्धा हुने बताइएको छ ।