स्वर्णविन्दुप्राशन लिने बढ्दै

तुलसीपुर दाङ, २९ चैत । तुलसीपुर उपमहानगरपालिका–१८ विजौरीस्थित प्रादेशिक आयुर्वेद चिकित्सालयमा स्वर्णविन्दुप्राशन लिनेको सङ्ख्या बढेको छ । आर्थिक वर्ष २०७९/८० देखि उक्त सेवा सुरु भएको हो ।

सोही आवमा पाँच हजार ५५ जनाले मात्र सेवा लिएकामा गत आव मा १२ हजार ६६६ ले सेवा लिएका छन् ।

चालु आवको चैत चौथो सातासम्ममा १६ हजार ८७७ जनाले यो सेवा लिएका छन् । पछिल्लो समय यो सेवा लिनेको सङ्ख्या बढिरहेका चिकित्सालयका सूचना अधिकारी वसन्तबहादुर केसीले बताए। “सुरुमा यो सेवा लिनेको सङ्ख्या न्यून थियो”, उनले भने, “अहिले भने अत्यधिक घुइँचो हुन थालेको छ ।”

बालबालिकाको मानसिक क्षमता बढाउने आयुर्वेद चिकित्सा पद्धति स्वर्णप्राशन हो । स्वर्णप्राशन मह, अश्वगन्धा, शङ्खपुष्पी, वाचालाई सुनको भष्मसँग मिसाएर तयार पारिने सूचना अधिकारी केसीले बताए। जन्मेदेखि पाँच वर्षसम्मका बालबालिकालाई स्वर्णप्राशन गराउने गरिन्छ ।

उनले स्वर्णप्राशनका लागि जिल्लाको तुलसीपुर उपमहानगरपालिकाबाहेक घोराही, शान्तिनगर, बबई, लमही, दङ्गीशरण गाउँपालिका र छिमेकी जिल्ला रोल्पा, प्यूठान, सल्यानबाट समेत आउने गरेका जानकारी दिए । उनका अनुसार यहाँ निःशुल्क रूपमा यो स्वर्णप्राशन गराउने गरिन्छ ।

“अहिले विभिन्न जिल्लाबाट स्वर्णप्राशनका लागि आउने गर्नुहुन्छ”, उनले भने, “हामीले निःशुल्क रूपमा यो सेवा दिँदै आएका छौँ ।” प्रत्येक महिनाको पुष्पनक्षत्रको दिन स्वर्णप्राशन गराउने गरिन्छ । यसले पनि पछिल्लो समय आयुर्वेदप्रति नागरिकको चासो बढ्दै गएको पुष्टि हुने अस्पतालका निमित्त निर्देशक डा प्रवेश श्रीवास्तवले बताए ।

थप समाचारहरु

घुम्ती सेवाबाट आठ सयजना लाभान्वित डगमरामा स्वास्थ्य इकाइ तथा बर्थिङ सेन्टर निःशुल्क स्वास्थ्य शिविरः मुटु तथा मिर्गौलाका सात सय बिरामी लाभान्वित लुम्बिनी प्रदेशमा मानसिक स्वास्थ्य रणनीति कार्यान्वयनमा गुल्मीका अठचालिस प्रतिशत नागरिक स्वास्थ्य बिमाको पहुँचमा निर्माण क्षेत्रका श्रमिकको निःशुल्क स्वास्थ्य परीक्षण